شنو اهو الـ Order Flow
شنو اهو
الـ Order Flow قراءة الأوامر اللي تنفذت بالسوق: منو اشترى ومنو باع بالـ market، وبأي كمية، وعند أي سعر. الشمعة تعطيك النتيجة، والـ Order Flow يعطيك اللي صار داخلها.
والـ Order Flow مو استراتيجية تحفظ شروطها وتتداولها. يبيله فهم وممارسة.
شلون ينقرا
السوق مزاد. كل صفقة لها طرفين وبنفس الكمية: واحد اشترى وواحد باع. فالسؤال مو «كم واحد اشترى»، السؤال: منو كان المستعجل؟
فيه نوعين أوامر:
- الـ limit: أمر عند سعر محدد، ينطر لين أحد يجيه.
- الـ market: أمر يتنفذ على طول من اللي ينطر. هذا المستعجل، واهو اللي يحرك السعر.
والقراءة تمشي بثلاث أسئلة، بالترتيب:
- وين؟ مكان السعر من تداول الجلسة اللي قبلها. هذا من الـ Volume Profile والـ VWAP.
- شنو طبيعة الحركة؟ هادية ولا سريعة. هذا من الـ Gamma، وعلى ES بس.
- شنو صار بالعقود؟ لما السعر وصل المستوى. هذا من الـ Footprint والـ Delta.
كل سؤال بروحه، وما ينخلطون. وكل جواب يوصف اللي صار لين هاللحظة، وما يقول وين بيروح السعر.
مثال
على ES، وبأرقام توضيحية:
قيمة الجلسة اللي طافت بين 5,995.00 و6,025.00. اليوم السعر طلع فوق 6,025.00.
على الشارت العادي تشوف شمعة خضرا وبس. بالـ Order Flow تشوف شي زيادة: عند 6,026.00 اشترى 4,000 عقد بالـ market، والسعر ما طلع أكثر من tick.
هذي معلومة ما تبين بالشمعة: كمية كبيرة، وحركة ما تستاهلها. شنو معناها، ومتى تنحسب مؤكدة؟ هذا تلقاه بصفحة الـ Absorption.
الغلط اللي يطيح فيه المبتدئ
- يدور إشارة شراء وبيع. الـ Order Flow وصف للي صار، مو إشارة.
- يفتح الـ Footprint على كل شمعة ويضيع بالأرقام. أول شي المكان، وبعدها العقود عند المكان.
- يقول «المشترين أكثر من البايعين». كل عقد له مشتري وبايع. اللي يختلف منو استعجل.
- يحسب إن الحجم اللي بشارت الوسيط نفس حجم البورصة.
على سوق ثاني
الـ Order Flow ينقرا من بورصة مركزية كل الصفقات تمر منها. عشان جذي أقراه من عقود CME وCOMEX: ES وNQ وGC.
وما يحتاج تتداول Futures عشان تستفيد. تقرا من المصدر، وتطبق على السوق اللي تتابعه. بس انتبه: سعر الوسيط (مثل XAUUSD وEURUSD وUS500) يختلف عن سعر CME وCOMEX. فحدد الفرق (basis) بنفس الدقيقة قبل ما تستخدم أي مستوى أو تحلل أو تدخل أي صفقة، وانقل المستوى كمنطقة مو كخط.
وشارت الوسيط فيه tick volume، يعني عدد مرات تغيّر السعر، مو عقود حقيقية. فالـ Footprint والـ Delta ما ينقرون منه.
شلون تحدد الفرق: صفحة الـ basis.
وين تكمل
هالصفحة تقولك شنو اهو. شلون تقراه خطوة خطوة، هذا اللي نسويه مع بعض بـ الورشة.
المحتوى تعليمي، ومو نصيحة مالية. وكل الأرقام بالأمثلة توضيحية، مو أسعار حقيقية.