شنو اهو الـ VWAP
شنو اهو
الـ VWAP، أو Volume Weighted Average Price، اهو متوسط السعر اللي تداول فيه السوق خلال الجلسة، موزون بعدد العقود عند كل سعر. السعر اللي تداولت عنده عقود أكثر ياخذ وزن أكبر بالمتوسط.
شلون ينقرا
الـ VWAP خط واحد يبدا من أول الجلسة ويتحرك معاها. وأسأل فيه سؤال واحد: السعر فوقه ولا تحته؟
- فوقه: السعر الحين أعلى من متوسط تداول الجلسة.
- تحته: السعر الحين أقل من متوسط تداول الجلسة.
وصف لمكان السعر، مو أكثر.
من وين يبدا؟ عندي محسوب على نفس جلسة الـ Volume Profile بالضبط: لـ ES وNQ من بداية الـ Cash Session الساعة 9:30 بتوقيت نيويورك، ولـ GC من بداية جلسة COMEX الساعة 8:20.
وفيه اثنين VWAP، لا تخلط بينهم:
- VWAP الجلسة اللي ماشية: خط يتحرك مع كل صفقة.
- VWAP الجلسة اللي طافت: رقم واحد ثابت، اهو قيمة الخط عند الإغلاق.
والفرق عن الـ POC: الـ POC يقولك وين تداول السوق أكثر شي. الـ VWAP يقولك بأي متوسط تداول. بيوم التوازن يقربون من بعض. وباليوم اللي مشى باتجاه واحد عادةً يبتعدون.
وأنا أستخدم الـ VWAP بعض المرات، مو بكل قراءة. اهو مرجع واحد، وما أكثر الخطوط حوله.
مثال
على ES، وبأرقام توضيحية:
الجلسة اللي طافت: الـ POC عند 6,010.00، والـ VWAP عند الإغلاق 6,018.50، والسعر سكر عند 6,024.00.
شنو تقرا؟ الإغلاق فوق الـ VWAP. والـ VWAP أعلى من الـ POC بثمان نقاط ونص.
يعني أكثر سعر تداول كان تحت، بس متوسط الجلسة انسحب لفوق: فيه تداول صار بأسعار أعلى رفع المتوسط. هذا وصف لجلسة خلصت.
الغلط اللي يطيح فيه المبتدئ
- يخلط بين الخط المتحرك حق اليوم والرقم الثابت حق الجلسة اللي طافت.
- يبدا الـ VWAP من أول اليوم (الليل) بدال أول الـ Cash Session، فيطلع رقمه غير.
- يحسب إن السعر لازم يرجع للـ VWAP.
- يحط حوله خطوط وايد، ويضيع بينها.
على سوق ثاني
الـ VWAP بشارت الوسيط محسوب من tick volume، يعني عدد مرات تغيّر السعر عند الوسيط، مو عقود حقيقية. وجلسته على توقيت السيرفر. فالرقم يطلع غير.
اعتمد الـ VWAP من CME وCOMEX. وسعر الوسيط (مثل XAUUSD وEURUSD وUS500) يختلف عن سعر CME وCOMEX. فحدد الفرق (basis) بنفس الدقيقة قبل ما تستخدم أي مستوى أو تحلل أو تدخل أي صفقة، وانقل المستوى كمنطقة مو كخط.
وين تكمل
الـ VWAP يجاوب «وين» مع الـ Value Area. وشلون نجمع المكان مع العقود بقراءة وحدة، هذا اللي نسويه بـ الورشة.
المحتوى تعليمي، ومو نصيحة مالية. وكل الأرقام بالأمثلة توضيحية، مو أسعار حقيقية.