شنو اهو الـ Footprint

شنو اهو

الـ Footprint يفتح لك الشمعة من داخل: يوريك كم عقد تداول عند كل سعر فيها، ومنو اشترى ومنو باع بالـ market. الشمعة العادية تعطيك أربع أرقام بس: فتح وأعلى وأدنى وإغلاق.

شلون ينقرا

كل صف بالـ Footprint سعر واحد، وبين صف وصف tick واحد. وكل صف فيه رقمين:

  • الـ Bid، على اليسار: كم عقد انباع بالـ market عند هالسعر.
  • الـ Ask، على اليمين: كم عقد انشرى بالـ market عند هالسعر.

الاثنين market orders: ناس ما انطروا. فالـ Footprint ما يوريك الأوامر اللي تنطر، يوريك اللي تنفذ.

ونفس الشمعة تنعرض بثلاث طرق:

  1. الرقمين جنب بعض (Bid × Ask).
  2. مجموعهم (الحجم عند كل سعر).
  3. الفرق بينهم (الـ Delta عند كل سعر).

ابدا بالرقمين جنب بعض لين تتعود. وأنا يومي على عرض الفرق.

والألوان تختلف من منصة لمنصة. اللي يثبت: الـ Bid يسار والـ Ask يمين.

وأنا أقرا الـ Footprint على Range chart: كل شمعة فيه لها مسافة ثابتة بالسعر، مو وقت ثابت. فلما شمعة تاخذ عقود أكثر من اللي قبلها، أعرف إن نفس المسافة احتاجت جهد أكثر. والإعداد كل واحد يختاره لمنصته وللعقد اللي يقراه.

وأهم شي: الـ Footprint ينقرا عند مستوى. المكان أول، والعقود بعده.

مثال

على ES، وبأرقام توضيحية:

شمعة طلعت من 6,000.00 لين 6,002.00. عند السعر 6,001.00 بالـ Footprint:

  • الـ Bid: 120
  • الـ Ask: 450

يعني عند 6,001.00 انشرى 450 عقد بالـ market، وانباع 120 بس. اللي اشترى بالـ market كان أكثر عند هالسعر.

هذا وصف لصف واحد. عشان تقرا الشمعة تطالع صفوفها كلها، ووين اهي من مستويات الجلسة اللي طافت.

الغلط اللي يطيح فيه المبتدئ

  • يفتح الـ Footprint على كل شمعة بالشارت. تضيع. اقراه عند مستوى من الـ Volume Profile بس.
  • يعكس الجهتين: يحسب الـ Bid شراء. الـ Bid يسار واهو اللي انباع بالـ market.
  • يحكم من أرقام صغيرة. صف فيه 8 مقابل 2 ما يقول شي.
  • يشوف شاشة بعرض الـ Delta ويقراها كأنها Bid × Ask.
  • يحسب إن الرقم الكبير بجهة معناه السعر بيمشي لها. مرات الكمية الكبيرة تنبلع: صفحة الـ Absorption.

على سوق ثاني

الـ Footprint يحتاج عقود حقيقية ومعروف منو المستعجل بكل صفقة. هذا موجود ببيانات البورصة (CME وCOMEX) بس. شارت الوسيط فيه tick volume، وما ينطلع منه Footprint.

فتقرا الـ Footprint على ES أو NQ أو GC، وتنقل المنطقة لشارتك. وسعر الوسيط (مثل XAUUSD وEURUSD وUS500) يختلف عن سعر CME وCOMEX. فحدد الفرق (basis) بنفس الدقيقة قبل ما تستخدم أي مستوى أو تحلل أو تدخل أي صفقة، وانقل المستوى كمنطقة مو كخط.

وين تكمل

الخانات الملونة بالـ Footprint لها صفحة: الـ Imbalance. وقراءة الصفوف عند مستوى، صف صف، هذا اللي نتمرن عليه بـ الورشة.

المحتوى تعليمي، ومو نصيحة مالية. وكل الأرقام بالأمثلة توضيحية، مو أسعار حقيقية.